Espazo Incuvi, punto de encontro do emprendemento universitario. 17 de feb. de 2022
Espazo Incuvi, punto de encontro do emprendemento universitario.
As novas instalacións, patrocinadas polo Banco Santander, o CTAG, o Consorcio da Zona Franca de Vigo, BBVA, a Autoridade Portuaria de Vigo e Abanca, están abertas a toda a comunidade universitaria, contan cun espazo central de formación e mentorización e seis salas multifunción.
125 metros cadrados dedicados integramente ao fomento do emprendemento universitario. A Universidade de Vigo estreou este xoves espazo Incuvi, unhas novas instalacións que substitúen os niños de Cidade Universitaria e coas que a institución académica viguesa busca dar un novo impulso ao apoio de todas as iniciativas empresariais innovadoras que xorden no seo da comunidade universitaria. A idea, tal e como se explicou na presentación, é que este novo espazo se converta en centro neurálxico do emprendemento universitario e que del se beneficie non só o alumnado, tanto o actual como o antigo, senón tamén todo o persoal docente e investigador que poida estar interesado na posta en marcha de accións de fomento do emprendemento.
