Acto institucional do 8M na Universidade de Vigo 6 de mar. de 2025
Acto institucional do 8M na Universidade de Vigo
A Universidade de Vigo volve un 8 de marzo máis, Día Internacional da Muller, a reafirmar e visibilizar o seu compromiso activo coa loita pola igualdade de xénero. No seu acto institucional con motivo desta data, entregou este xoves o premio Uviguala 2025 de compromiso coa igualdade de xénero. Este ano o galardón recaeu en Alejandra Babarro, Mercedes Pérez e Alba Portela, técnicas que xestionan o Espazo Violeta da Biblioteca Universitaria Rosalía de Castro do campus de Ourense, onde se poñen en valor fondos deste centro no campo do feminismo e da igualdade.
O acto tivo lugar no Edificio de Ferro do campus de Ourense, contando coa asistencia de Manuel Reigosa, reitor da Universidade de Vigo; as e os vicerreitores Francisco Javier Rodríguez, Mónica Valderrama e Eva María Lantarón; Yolanda Rodríguez, directora da Unidade de Igualdade da UVigo, e integrantes da comunidade universitaria.
Fonte: DUVI
