Debate 1. Son adecuadas as intervencións militares como medio para combatir o terrorismo? 9 de dec. de 2015

Dous equipos maioritariamente femininos e formados por estudantes da Facultade de Dereito do campus de Ourense enfrontáronse na gran final. Finalmente, a vitoria foi para Iuris et de Iure, que por sorteo previo tivo que defender a postura de que as intervencións militares non son axeitadas como medida para combater o terrorismo. Foi un debate moi axustado arredor desta cuestión de actualidade no que gañaron todas as persoas participantes, que aprenderon a importancia de expor bos argumentos á hora de defender unha postura, sexa cal sexa. Segundo explica Pablo Raúl Bonorino, profesor de Filosofía do Dereito promotor desta actividade desde o campus de Ourense, na final competiron dous equipos formados por alumnas e alumnos da Facultade de Dereito. O grupo As Argumentistas, que tivo que defender a posición afirmativa no debate, e o grupo Iuris et de Iure, que por sorteo debeu defender a posición negativa. “O debate estruturouse en catro quendas de palabra alternados, o primeiro de cinco minutos e os restantes de catro, polo que tivo unha duración de 34 minutos. Ao final o xurado, composto por unha profesora de Humanidades, un profesor de Ciencias e un ex alumno de Dereito que competiu en ligas fóra da nosa Universidade, decidiu por moi pouco e por maioría ao equipo gañador”, comenta o docente. Participación de once equipos Con esta final péchase a terceira edición da Liga de Debate, que se iniciou no campus de Ourense o mércores 2 de decembro celebrando unha fase clasificatoria e celebrándose unha clase maxistral sobre a argumentación en debates, co obxectivo de que as persoas que non tivesen experiencia na materia puidesen incorporarse á actividade axeitadamente. A participación foi por equipos, que debían ter un mínimo de dous participantes e un máximo de catro. En total competiron once equipos, oito da Facultade de Dereito, un de Historia, un de Ciencias da Educación, concretamente de Traballo Social, e outro composto por alumnos e alumnas de Francia, México e Brasil que están este cuadrimestre no campus de Ourense ao abeiro dalgún programa de mobilidade internacional, como o Programa Erasmus. O debate da final foi aberto por Marta Fernández, decana da Facultade de Dereito, e pechado por José María Faílde, director da Área de Planificación do campus de Ourense, que fixo entrega dos premios aos gañadores e gañadoras desta terceira edición da Liga de Debate da Universidade de Vigo. O evento foi gravado por UvigoTV, polo que desde a organización convidan a todas as persoas que non puideron asistir a velo a través desta canle.