O Pergamiño Vindel en Vigo e Galicia para o mundo 5 de mar. de 2018
O Pergamiño Vindel en Vigo e Galicia para o mundo
O Museo do Mar acolleu o acto de despedida á obra de Codax, que volve a Nova York
Nas horas previas ao seu regreso á Morgan Library e Museum de Nova York, o Pergamiño Vindel recibiu o adeus dunha ampla representación da sociedade viguesa e galega, que se deu cita esta tarde no Museo do Mar de Galicia, nun acto, no que o presidente da Xunta e o reitor da Universidade de Vigo foron os encargados de verbalizar a despedida á obra de Martin Codax, que os artistas Roi Casal e Uxía interpretaron coas súas voces e a súa música. Un bardo e un xograr, acompañados de bufóns, malabaristas e músicos, todos da compañía Troula Animación, conduciron o acto ao que asistiron, entre outras autoridades, o alcalde de Vigo, a valedora do Pobo, o presidente do Consello Consultivo de Galicia, a presidenta da Deputación de Pontevedra, o presidente da Real Academia Galega, así como representantes dos ámbitos político, económico e social de Galicia.
