Intervencións dos compoñentes da mesa Xosé Soto, Xandre Rodríguez Guerra e Darío Gil Arias 21 de maio de 2021

Visto 6 veces
Marcas:
  1. Intervención de Xosé Soto : 00:00:01
  2. Intervención de Alexandre Rodríguez Guerra : 00:01:53
  3. Intervención de Darío Gil Arias : 00:07:35

Intervencións dos compoñentes da mesa Xosé Soto, Xandre Rodríguez Guerra e Darío Gil Arias

A que un día foi tamén a súa universidade, a Universidade de Vigo, uniuse este xoves á homenaxe que se lle rende este ano no Día das Letras Galegas a Xela Arias. Familiares da escritora, autoridades, membros da comunidade universitaria e futuros mestres e mestras coma a escritora lucense déronse cita nun acto na Facultade de Educación e Traballo Social do campus de Ourense no que, recollendo o gusto de Xela por achegar a poesía a outras artes, a través da palabra, da fotografía e da música se quixo render tributo a esta poeta, tradutora e mestra.

A homenaxe contou coa presenza de Manuel Reigosa, reitor da Universidade de Vigo; Valentín García, secretario xeral de Política Lingüística da Xunta de Galicia; Esther de Blas, vicerreitora do Campus de Ourense; Mónica Valderrama, vicerreitora de Comunicación e Relacións Institucionais; Xosé Manuel Cid, decano da Facultade de Educación e Traballo Social; José Montero, decano da Facultade de Filoloxía e Tradución, e Fernando Ramallo, director da Área de Normalización Lingüística. Nas súas palabras, o reitor da UVigo quixo destacar “a importancia da figura de Xela Arias para o desenvolvemento da nosa cultura”, unha figura que, afirmou, “axigántase, faise cada vez máis grande e nos vai permitir chegar con ese afán de modernidade a unha nova xeración de galegos e galegas que seguramente van sentirse moito máis cómodos e orgullosos da súa lingua, da súa cultura e de como somos os galegos e galegas”. Manuel Reigosa subliñou a relevancia de pór en valor o legado cultural e de traballar desde o eido universitario pola normalización lingüística, para rematar desexando “mil primaveras máis para a nosa lingua”. Igualmente, Monica Valderrama recalcou como Xela Arias foi “unha figura transgresora, adiantada ao seu tempo, que pola súa obra e imaxe é unha oportunidade para achegar a creación literaria a un público máis novo”.

Pola súa banda, Valentín García destacou a relevancia da conmemoración do Día das Letras Galegas sinalando como “non é nada común que un país renda un tributo desta categoría á súa lingua, á súa literatura, á súa cultura”. Da homenaxeada este ano salientou como “foi unha gran mestra, de vida, de estética literaria, de ética, e tamén mestra de profesión, filla dun gran mestre, Valentín Arias, e nai de Darío, que tamén é mestre”. Ademais, o secretario xeral gabou o compromiso da Universidade de Vigo no impulso e defensa da lingua galega, algo que, afirmou, “nos enche de honra como país”.

Xosé Soto Andión
Departamento Filoloxía galega e latina, Universidade de Vigo
Alexandre Rodríguez Guerra
Profesor de filoloxía Galega, Universidade de Vigo
Darío Gil Arias
Entrenador en Volei Praia Vigo