A ECIMAT celebra o seu décimo aniversario 10 de xuño de 2016

Visto 1412 veces

A ECIMAT celebra o seu décimo aniversario

A estación de Toralla conmemora a efeméride asinando un convenio coa Universidad del País Vasco

Aínda que abriu as súas portas en xuño de 2006, o xermolo da Estación de Ciencias Mariñas de Toralla, Ecimat, remóntase ao ano 1999, cando o entón vicerreitor de Investigación e hoxe reitor da Universidade de Vigo, Salustiano Mato, fixo súa a demanda dun grupo de investigadores e investigadoras que solicitaban dispor de instalacións científicas a pé de mar. O actual director da Ecimat, Jesús Souza Troncoso, foi o encargado este venres, no acto conmemorativo do décimo aniversario da estación, de lembrar as súas orixes e a súa evolución ata o momento presente, así como de fixar os retos de futuro aos que se enfronta o centro de investigación mariña. Pero máis aló dos recordos e do que está por chegar, o acto de celebración de, en palabras de Souza, “10 anos de vocación mariña”, estivo protagonizado pola sinatura por parte dos reitores das universidades de Vigo e do País Vasco do convenio para a constitución do nodo español do European Marine Biological Resource Centre, EMBRC, unha das 38 infraestruturas de investigación identificadas pola Comisión Europea como estratéxicas para Europa, que centra a súa actividade na biotecnoloxía azul, disciplina que se ocupa da exploración e explotación dos organismos mariños, co obxectivo de empregar estes e os seus derivados para a identificación, procesamento e desenvolvemento de novos ingredientes e orixe mariño. Coa sinatura do convenio subscrito hoxe por Salustiano Mato e Iñaki Goirizelaia créase a estrutura que representa a España en EMBRC, integrada pola Ecimat e a Estación Marina de Plentzia da UPV/EHU e á que se suman centros de investigación mariña doutros nove países europeos. “Este nodo faranos máis visibles e apetecibles para os investigadores que queiran vir aquí e tamén para que o noso persoal investigador vaia a calquera lugar”, asegurou o reitor da Universidade de Vigo, que manifestou o seu convencemento en que “nos agarda un futuro prometedor”. Pola súa banda, o reitor da UPV/EHU destacou a importancia do convenio asinado hoxe “que establece un marco de traballo e abre grandes posibilidades en tres dimensións: a investigación, a docencia e transferencia”, dixo Goirizelaia. Á sinatura do convenio seguiulle o descubrimento dunha placa que identifica á Ecimat como integrante como nodo español do EMBRC.

Presenta: Salustiano Mato de la Iglesia
Reitor, Universidade de Vigo
Jesús Souza Troncoso
Director da Ecimat, Universidade de Vigo
Iñaki Goirizelaia
Reitor, UPV/EHU
Jaime Aneiros Pereira
Concelleiro de Orzamentos e Facenda, Concello de Vigo
Laura Yuste
Representante da Secretaría de Estado do Ministerio de Economía, Goberno de España

Vídeos da mesma serie
A ECIMAT celebra o seu décimo aniversario
A estación de Toralla conmemora a efeméride asinando un convenio coa Universidad del País Vasco
10 de xuño de 2016