No seu 25 aniversario a Universidade de Vigo descobre unha cápsula do tempo que se abrirá en 2040 19 de xuño de 2015

Metal e pedra transformados pola man do escultor Alfonso Costa na Cápsula do tempo, custodiarán dende hoxe e ata 2040 un anaco do presente da Universidade de Vigo. Transcorridos os primeiros 25 anos da súa existencia, a institución académica deixou este venres 19 de xuño testemuño do que é a día de hoxe, a través das achegas realizadas por todas as escolas e facultades que integran os tres campus. Unhas mazas procedentes da Facultade de Ciencias da Educación e do Deporte, unha táboa periódica da Facultade de Química, un libro da Facultade de Ciencias da Educación do campus de Ourense, unha orla de Fisioterapia, así como bandas de graduación e moitos CD e USB con información sobre cada un dos centros que conforman a Universidade de Vigo descansan desde hoxe nos tres caixóns, un por campus, que forman parte da Cápsula do tempo, instalada no xardín anexo ao edificio de Servizos Centrais. “Isto é unha homenaxe a toda a comunidade universitaria que fixo posible o que somos e unha maneira de que nos recorden dentro de 25 anos cando se abra a cápsula”, dixo o reitor da Universidade de Vigo, Salustiano Mato, no seu discurso, pronunciado tralo descubrimento da escultura e a colocación dos obxectos achegados desde os tres campus no interior da mesma.