Acto de inauguración do XXVI Foro Tecnolóxico de Emprego 24 de feb. de 2026

No acto de apertura todo foron parabéns: do reitor, Manuel Reigosa; dos responsables das súas escolas-Elena Alonso, de Enxeñaría de Minas e Enerxía; José Fariña, de Enxeñaría Industrial, e Rebeca Díaz, da EE de Telecomunicación-; do alcalde, Abel Caballero; da delegada territorial da Xunta de Galicia en Vigo, Ana Ortiz, e da directora xeral de Traballo Autónomo e Economía Social, Marta Mariño.

Todas e todos lles deron os seus parabéns porque, tal e como apuntou o reitor, “cada ano cando marchamos do foro pensamos que algo que xa está tan pulido e que ten tanto éxito non pode mellorarse, pero, de novo fixéstelo”. Neste aspecto, fixo tamén fincapé a directora da EET, que exerceu como anfitrioa, remarcando a importancia do “excelente labor” de transmisión de coñecemento que realizan dunha a outra xeración, “de maneira que, entre todos, se está a conseguir algo cada vez mellor”.

De cara ao futuro formuláronlle novos retos e, neste aspecto, foi no que se centrou o alcalde, Abel Caballero, que os animou a pór todo o seu talento ao servizo da sociedade. “Vós sodes os que vos ides encargar dos grandes desenvolvementos tecnolóxicos e tendes que ser quen de conseguir que todo isto repercuta no conxunto da sociedade, que se traduza en avances sociais”, insistiulles o rexedor vigués.

Pola súa banda, a delegada da Xunta en Vigo, non dubidou en referirse a este encontro como o “foro universitario máis relevante da nosa comunidade e un dos máis destacados de toda España” e, nesta liña, non dubidou en comprometer o apoio da Xunta a este iniciativa. “Nestes dous días miles de estudantes atopádesvos cara a cara con empresas líderes que veñen aquí á busca do que máis necesitan: a vosa innovación, a vosa enerxía e a vosa capacidade de transformar o futuro”, subliñoulles Ortiz, referíndose ao foro como “o primeiro paso real cara o mundo profesional”.
Fonte: DUVI