Xornadas de Benvida 6 de set. de 2019
Xornadas de Benvida
A Universidade recibe con música, postos informativos, obradoiros e actividades lúdicas ao seu novo alumnado. Máis de 2000 estudantes pasaron polas xornadas nos tres campus.
Antes das presentacións, das clases e dos apuntamentos, o alumnado de novo ingreso dos tres campus da Universidade de Vigo tivo a oportunidade de achegarse á que será a súa casa durante os próximos anos dun xeito lúdico e festivo. Por primeira vez, a institución académica organizou unha xornadas de benvida polas que pasaron máis de 2000 novos estudantes dos diferentes graos que, entre música, xeados e refrescos, puideron coñecer os servizos que ofrece a Universidade, como a oferta cultural e deportiva, aloxamento, transporte, tarxeta universitaria, biblioteca, bolsas e axudas, mobilidade, cursos de linguas, certames e concursos, emprego e emprendemento, voluntariado, etc.
Tras Ourense e Pontevedra, foi a quenda de Vigo, cunha praza Miralles ateigada de mozas e mozos que se foron achegando aos diferentes postos informativos, entre eles un Punto Lila da Unidade de Igualdade, para recibir información e tamén para solucionar dúbidas. Ademais puideron coñecer iniciativas postas en marcha polo propio alumnado da Universidade de Vigo, como o equipo UVigo Motorsport e o seu coche da competición Formula Student, ou asistir ás demostracións científicas realizadas pola Aula Aberta á Tecnociencia da Escola de Enxeñaría de Minas e Enerxía.
