OrientaMe: orientación académica para estudantes 28 de nov. de 2024

A desinformación entre os estudantes sobre as múltiples opcións académicas que teñen á súa disposición leva nalgúns casos a lamentar a súa elección e, en consecuencia, a abandonar os seus estudos.
Por iso propoñemos a creación dunha aplicación de orientación académica. Deste xeito, o noso público destinatario (alumnado de 4o ESO, Bacharelato, etc.) pode aproveitar todas as funcións incluídas nesta aplicación e decidir dun xeito claro e sinxelo sobre o seu futuro académico.
OrientaMe permite realizar un cuestionario para coñecer polo miúdo os intereses, habilidades e preferencias, co obxectivo de mostrar unha oferta educativa personalizada e adecuada ás súas necesidades. A continuación, o algoritmo da aplicación comeza a buscar con toda a información recollida as opcións que mellor se adaptan a cada perfil.
Cada oferta educativa conta con información detallada sobre as materias e as oportunidades profesionais asociadas, o que permite ver como a elección dos distintos estudos pode influír no futuro profesional. Ademais, conta cunha sección na que se recollen opinións e experiencias dos que utilizaron previamente a aplicación.
En resumo, OrientaMe é unha ferramenta de apoio que proporciona ao alumnado información e orientacións personalizadas e actualizadas para facilitar a toma de decisións, minimizando o risco de arrepentimento e abandono e favorecendo o éxito académico.