Móvete 28 de nov. de 2024

Móvete é unha aplicación para dispositivos móbiles pensada principalmente para persoas con mobilidade reducida ou os seus acompañantes, co obxectivo de crear rutas para que cheguen aos seus destinos de forma máis rápida e eficiente.
A súa principal funcionalidade é un mapa interactivo que clasifica lugares mediante un sistema de puntos de cores: verde para zonas accesibles, amarelo para dificultades moderadas e vermello para barreiras graves.
A comunidade de usuarios pode engadir e actualizar puntos en tempo real, enriquecidos con descricións e fotos, mentres que un sistema dirixido por un moderador garante a precisión dos datos mediante revisións automáticas e manuais. Ademais, os participantes cunha traxectoria fiable terán maior peso nas súas achegas.
Entre as súas outras características, Móvete inclúe filtros personalizables, busca avanzada, rutas accesibles recomendadas e notificacións sobre cambios na accesibilidade. Tamén permite informar de barreiras arquitectónicas, como ramplas en mal estado, acumulación de lixo. . . Estas queixas remítense directamente ás entidades locais, fomentando e integrando os concellos para buscar solucións.
Tamén conta cunha sesión de suxestións e un sistema de chat de apoio, xa que a aplicación priorizará a mellora continua en función dos comentarios dos usuarios.
Móvete non só é unha ferramenta práctica para persoas con mobilidade reducida, senón que tamén quere fomentar que as cidades o sexan destacando a importancia de eliminar as barreiras urbanas.