Optimización de infraestruturas: Climatización, acústica e zonas colaborativas 27 de mar. de 2026

Este estudo analiza as instalacións da Escola de Enxeñería Industrial (EEI) na sede de Torrecedeira, identificando deficiencias críticas que afectan a aprendizaxe e a socialización. Mediante enquisas ao estudantado, detectouse unha insatisfacción xeneralizada co ruído ambiental, especialmente en zonas de máquinas expendedoras e corredores, onde o lecer
interfire coa actividade académica. Así mesmo, o confort térmico é deficiente, reportándose calor excesiva no verán e falta de calefacción na biblioteca e a planta baixa durante o inverno. Finalmente, evidénciase que os espazos de traballo grupal, como o "galiñeiro", son insuficientes e propician distraccións mutuas debido á falta de delimitación. Para solucionar estas problemáticas, proponse unha redistribución estratéxica baseada na zonificación.
O plan inclúe trasladar as máquinas expendedoras ao hall do edificio antigo para silenciar as áreas lectivas. Para mellorar o traballo colaborativo, proxéctase a instalación de módulos cúbicos na primeira planta do edificio vello, garantindo privacidade sen afectar o estudo individual. Para rematar, a intervención climática contempla instalar aire acondicionado en aulas e reforzar a calefacción nos puntos fríos identificados. Estas medidas buscan separar eficazmente os fluxos de actividade social e académica, garantindo unha contorna óptima e un maior benestar para toda a comunidade universitaria.